Kryeministri Edi Rama tha një ditë më përpara se kryediplomati i BE-së Josep Borrell të vizitonte Tiranën, se një zyrtar i Brukselit kishte thënë se protestat që po zhvillohen për ë kundërshtuar rritjen e çmimeve të karburanteve dhe produkteve të shportës i shërbenin Rusisë dhe Kremlinit.
Shqiptarët kanë mbi një javë që protestojnë për rritjen e çmimeve të karburanteve, energjisë dhe ushqimeve, duke kërkuar lehtësime të ndryshme fiskale. Qeveria ka futur disa masa, por ka thënë vazhdimisht se protestuesit janë një turp dhe po forcojnë Kremlinin.
“Qytetarët në Shqipëri, si dhe në pjesën tjetër të Ballkanit Perëndimor dhe më gjerë, kanë shqetësime legjitime për rritjen e çmimeve të karburanteve dhe ushqimeve. BE rikujton se respektimi i standardeve evropiane për lirinë e grumbullimit paqësor, dhe për mbrojtjen dhe përfshirjen e grupeve të cenueshme, janë kërkesat kyçe të anëtarësimit që monitorohen nga afër. Të gjithë aktorët e përfshirë duhet të ushtrojnë qetësinë dhe përmbajtjen maksimale”, ka thënë Komisioni Evropian.
Deklarata e Komisionit vazhdoi se rritja e çmimeve është “rënduar kryesisht nga lufta e agresionit të nisur nga Rusia kundër Ukrainës”, dhe jo nga sanksionet e BE-së dhe përafrimi i Shqipërisë me to.
Komisioni vuri në dukje gjithashtu ngritjen e një komiteti të posaçëm për të trajtuar ndikimin e luftës së Rusisë kundër Ukrainës në ekonominë shqiptare dhe bordit kombëtar për administrimin e karburanteve, si dhe monitorimin e vazhdueshëm të situatës nga Autoriteti i Konkurrencës së Shqipërisë.
Për këtë ka reaguar dhe drejtuesi i Lëvizjes Vetëvendosje në Shqipëri, Boiken Abazi, ku me anë të një postimi në llogarinë e tij në “Facebook”, ai ka ndarë 3 pika, përkrah imazhit të EURACTIV.
“1. Rama deklaroi që protestat në Shqipëri kundër rritjes së çmimeve i shërbejnë Rusisë.
- Komisioni Evropian deklaroi sot që këto protesta qytetare në Shqipëri janë legjitime.
- Sipas “logjikës” së Ramës për këto protesta, a do të thotë kjo se tani Komisioni Evropian po i shërben Rusisë? ”, shkruan Abazi.
Kujtojmë që protestuesit i kanë bërë një sërë kërkesash Ramës dhe kanë thënë se nëse nuk plotësohen do të mblidhen të shtunën në të gjithë vendin për të vazhduar protestën.
Discussion about this post