Protestat në Britani, “blindohen” rrugët, 6 mijë forca policie në terren, lirohen edhe disa vende në burgje

Autoritetet britanike vijojnë të jenë në gatishmëri të madhe, për të përballuar tubimet masive që kanë nisur prej disa ditësh, pas vrasjes së tre vajzave në një kurs kërcimi.

Rreth 6 mijë efektivë do të jenë në terren, ndërsa për të dënuar protestuesit që dëmtojnë institucionet shtetërore janë liruar 567 vende në burgje.

Autoritetet britanike po përballen gjithashtu me akuza nga e djathta ekstreme, duke i kritikuar për aplikimin e standardeve të dyfishta.

Keir Starmer iu përgjigj akuzave dhe këmbënguli që policia britanike të veprojë “pa frikë apo paragjykim”.

Ndonëse mbrëmja e djeshme ka qenë relativisht e qetë në krahasim me ditët e mëparshme, sërish policisë i është kërkuar një vëmendje më e shtuar për të mbajtur nën kontroll tubimet.

Rreth 400 arrestime janë bërë që nga fillimi i trazirave dhe mbi njëqind persona janë akuzuar dhe përballen me akuza për terrorizëm.