Banorët e lagjes Fushmbret në Elbasan kanë dalë sot në protestë për të kundërshtuar mungesën e energjisë elektrike, një problem që sipas tyre zgjat prej afro dy javësh. Ata shprehen se furnizimi është i kufizuar vetëm në disa orë të ditës, ndërsa nga mëngjesi deri rreth orës 17:00 zona mbetet pa energji.
Në këtë lagje jetojnë rreth 300 banorë, të cilët thonë se ndërprerjet e gjata u kanë vështirësuar ndjeshëm jetesën e përditshme dhe aktivitetet familjare e ekonomike. Sipas tyre, mungesa e energjisë ka krijuar probleme serioze, ndërsa nuk kanë marrë asnjë njoftim zyrtar për situatën apo për kohëzgjatjen e ndërprerjeve.
Banorët bëjnë me dije se u është komunikuar vetëm në mënyrë jozyrtare se ndërprerjet lidhen me punime në rrjetin elektrik dhe paralajmërojnë se protestat do të vijojnë deri në ndërhyrjen e institucioneve përgjegjëse. Një prej tyre, ish-elektricist, thekson se problemi është i hershëm dhe mund të zgjidhej më shpejt nëse sistemi do të funksiononte siç duhet.
Discussion about this post