Pas më shumë se katër muajsh që nga ndalimi i qarkullimit me monopatina, një grup aktivistësh dhe qytetarësh ka dalë sot në protestë para Ministrisë së Brendshme. Protestuesit kërkojnë kthimin e skuterave të sekuestruar dhe anulimin e vendimit që ndalon përdorimin e tyre në rrugët e kryeqytetit.
“Zonja ministre, ke futur duart në xhepin tim”; “Na gënjyet, na rrëmbyet pronën”; “Investimi iku, do mbajë kush përgjegjësi për paratë tona”, thuhet në disa nga pankartat që qytetarët mbajnë në duar.
Ata kërkojnë gjithashtu dëmshpërblim për bizneset dhe qytetarët që kanë pësuar humbje ekonomike si pasojë e ndalimit, duke theksuar se masat e marra kanë ndikuar negativisht në aktivitetin ekonomik dhe lirinë e lëvizjes urbane. Protestuesit shprehin shqetësim për mungesën e dialogut me institucionet dhe kërkojnë një zgjidhje të menjëhershme.
“Do doja të flisja si përdorues, kam 5 vite që lëviz me skuter, jetoj në Fresk dhe më duhej të shkoja në punë, njëherë në Alidem, te Komuna e Parisit, është një rrugë që me urban më merr 3 orë kohë. Nëse gjej vend, se ndryshe do duhet të pres në stacion. Përfaqësoj edhe një biznes të vogël familjar, për riparimin e skuterëve, 4 muaj e fundit na duhet të marrim kredi për të përballuar kostot.
Ministrja pa asnjë paralajmërim blloko skuterët. Është halli it ë rinjve që duan të rrinë në këtë vend, të jetojnë këtu dhe jemi të varur nga vendime të tilla arbitrare.
Kryeministri lëviz me helikopter, ndërsa ne të tjerëve na duhet të ecim me këmbë. Atyre qytetarëve tjerë në Korçë duhet të ecin me frikë, se rrugët shemben dhe ministrja në konferencën për mediat thotë që do presim të bëhet infrastruktura që të lirohen skuterët. Është antiligjore sekuestrimi i një prone private është i paligjshëm”, tha një protestuese.
Para disa ditësh, ministrja Albana Koçiu përsëriti se nuk do të tërhiqet nga vendimi për ndalimin e monopatinave dhe bëri me dije se po punohet për rregullimin e kuadrit ligjor që do të përcaktojë përdorimin e tyre në të ardhmen. Qytetarët dhe bizneset mbeten të shqetësuar për pasojat e masës.
Discussion about this post