Banorët e lagjes “Skëndërbeg” dhe Demokracia në Lezhë, protestuan këtë të shtunë para Drejtorisë Vendore të Policisë, pasi sipas tyre ky institucion nuk ka vepruar për të ndaluar veprimtarinë e fabrikës së mbetjeve me origjinë shtazore, e cila krijon ndotje në zonën ku ata jetojnë.
Sipas banorëve, Agjencia Kombëtare e Mjedisit ka vendosur pezullimin e aktivitetit të këtij subjekti prej datës 8 nëntor, deri në plotësimin e kushteve, por puna nuk është ndalur në asnjë çast dhe niveli i ndotjes është mjaft i lartë.
Drejtuesja e protestës, aktivistja Arilda Lleshi thotë se pavarësisht denoncimeve të vazhdueshme policia nuk vepron për të zbatuar vendimin e AKM-së për pezullimin e aktivitetit të kësaj fabrike.
Sipas vendimit të Agjencisë Kombëtare të Mjedisit, trupa inspektuese ka vendosur masë administrative 1.000.000 lekë dhe pezullimin e shkarkimit të ujerave që dalin nga procesi teknologjik, deri në marrjen e masave nga ana e subjektit.
Ndërkohë protestat e banorëve kundër kësaj fabrike kanë qenë të vazhdueshme, me pretendimin se krijon ndotje të madhe në zonë dhe po ju sjell probleme shëndetësore.
Discussion about this post