Banorët e fshatit Zall Her kanë protestuar ditën e sotme për transportin e fëmijëve drejt shkollës. Sipas banorëve, shkolla e mëparshme ekzistuese është mbyllur për shkak të numrit të ulët të nxënësve dhe rruga për në shkollën tjetër, është tepër e gjatë dhe e pakalueshme gjatë dimrit.
Prindërit e nxënësve shprehen se askush nuk u ka dhënë zgjidhje për problemin e tyre dhe se do të mundohet ta përçojnë shqetësimin e tyre deri në ministrinë e Arsimit.
“Problematika qëndron se nuk kemi një rrugëzgjidhje. Fëmijët bëjnë 2 javë pa shkollë. Shkuam tek drejtoresha nuk na dha asnjë zgjidhje. Asnjë nuk është shqetësuar, vetëm ne, po lëmë punën çdo ditë dhe askush nuk del për të na dhënë shpjegime. Na thanë se nuk na japin dot rrugëzgjidhje. Bëhet fjalë për 35 nxënës që rrinë në shtëpi pa mësim dhe pa asgjë. Kemi shkuar në drejtori të Arsimit dhe në ministri e nuk na kanë dhënë asnjë zgjidhje Nuk kemi mundur të sigurojmë transportin privat të fëmijëve. Unë kam 3 fëmijë për vete, nuk i çoj dot me një motor. Drejtoresha e shkollës, nuk ka mundësi të na zgjidhin problemin, atëherë të ankohet në instanca të mëtejshme. Kryeministri të na dëgjojë se fëmijët tonë janë pa shkollë“, tha njëri nga prindërit.
Prindërit kërkojnë që të gjendet një zgjidhje ose për transportin e fëmijëve drejt shkollës së re, ose të vazhdohet mësimi në të njëjtën shkollë ku kanë qenë.
