Naftëtarët e Ballshit kanë dalë sërish në protestë para uzinës, duke mos hequr dorë nga kërkesat e tyre. Disa ditë më parë ata kanë deklaruar për mediet se kanë informacione që uzina do të shitet për skrap duke theksuar se nuk do ta lejojnë një gjë të tillë.
Ata kanë paralajmëruar për përshkallëzim të protestës në rast se do të tentohet të nxirren objekte nga rafineria, teksa kërkojnë edhe likuidimin e 13 pagave të prapambetura.
“Të protestojmë kundra shitjes së uzinës për skrap. Të protestojmë për pagat tona te prapambetura. Fati dhe e ardhmja është në dorën tonë”, shprehen ata.
Nuk ka ende një reagim zyrtar nga autoritetet nëse uzina do të shkojë vërtetë për skrap, ndërsa për naftëtarët është përcaktuar një pagë prej 30 mijë lekësh në muaj për 2 vitet në vijim.
Megjithatë kjo zgjidhje nuk i ka kënaqur ata, teksa theksojnë se nuk kërkojnë lëmoshë, por atë që i takon për të gjitha vitet që kanë punuar në uzinën e Ballshit.
Banorët i bëjnë thirrje veçanërisht ministres për këtë çështje duke thënë se: “Ashtu si rafineria e Fierit që doli në ankand, edhe ky kombinat le që ndodh, se duhet të dalë me vendim parlamenti të shpallet falimenti i Armo, por marrin vendime sikur nuk ekziston kjo kompani fare”.
Discussion about this post