Pas më shumë se katër muajsh tubime të përditshme, qytetarët pritet të rikthehen sërish në qendër të Tiranës për të vijuar aksionin e tyre, me kërkesën kryesore largimin e kryeministrit Edi Rama dhe qeverisë së tij.
Ashtu si në ditët e mëparshme, protestuesit pritet të mblidhen fillimisht në sheshin “Skënderbej”, për të nisur më pas marshimin drejt Kryeministrisë.
Krahas dorëheqjes së Ramës, gjatë protestave janë artikuluar edhe kërkesa për krijimin e një qeverie teknike tranzitore, si dhe ndryshime në sistemin politik dhe zgjedhor.
Në tubimin e mbrëmshëm, qytetarët përsëritën thirrjet për dorëheqjen e kryeministrit dhe akuzuan qeverinë për korrupsion, shpërdorim të detyrës dhe keqqeverisje.
Protestuesit kanë deklaruar se nuk do të tërhiqen nga kërkesat e tyre dhe se tubimet do të vijojnë çdo ditë.
“Sazani, Zvërneci në fyt do ju ngecin”, “Dorëheqje”, ishin disa nga thirrjet e qytetarëve.
Me flamuj kombëtar, protestuesit kërkuan largimin e kryeministrit Edi Rama dhe qeverisë së tij. Qytetarët shprehen se janë të revoltuar ndaj keqqeverisjes, që po shpaloset përditë me skandale të njëpasnjëshme.
Ndërkohë, aksioni qytetar pritet të intensifikohet gjatë ditëve në vazhdim. Për 13 tetorin është paralajmëruar një tjetër protestë, ku është bërë thirrje për një pjesëmarrje më të madhe të studentëve dhe të rinjve.
Discussion about this post