90 ditë protestë! Qytetarët shprehen se do ‘përshëndesin’ Ramën dhe ministrat me vezë para selisë socialiste

Sot shënohet dita e 90-të e protestës qytetare.

Qytetarët do të organizohen sërish për të kërkuar dorëheqjen e kryeministrit Edi Rama dhe ndryshimin e kursit politik në vend.

Protesta pritet të nisë organizimin në sheshin “Skënderbej”, nga ku protestuesit më pas do të marshojnë përgjatë bulevardit drejt Kryeministrisë.

Ditën e sotme, pritet që protestuesit të mblidhen edhe para selisë së Partisë Socialiste në orën 17:30, ku është parashikuar të zhvillohet një mbledhje e ministrave dhe drejtuesve të qarqeve me kryeministrin Rama.

“Të marrin vezë me vete dhe të shkojmë t’u bëjmë përshëndetjen e radhës, duke iu thënë: “Nuk na përfaqësoni, nuk na përfaqësoni, nuk na përfaqësoni”.

Mos harroni, nesër te selia e PS-së”, tha aktivistja Arvina Lleshi në protestën e një dite më parë duke iu kërkuar qytetarëve që të mblidhen te selia rozë.

Në protestën që u mbajt dje te kryeministria, qytetarët përsëritën kërkesat e tyre të panegociueshme kundrejt qeverisë. Qytetarët kërkojnë, përveç dorëheqjes, edhe arrestimin e Ramës, të Sali Berishës dhe Belinda Ballukut.