Një grup banorësh është ngritur në protestë për rrugën e Komanit, pasi ministria e infrastruktures nuk e konsideroi prioritet këtë aks rrugor dhe nuk e parashikoi për investim duke anulluar kështu fondin.
Banorët janë mbledhur në protestë në afërsi të hidrocentralit të Komanit dhe deklarojnë se nga kjo zonë shtetit i vijnë miliona euro dhe ka 40 vite që nuk investohet. Për banorët është e papranueshme që një zonë që lidh Komanin me Parkun e Valbonës, Thethin dhe lumin e Shalës të jetë në harresë totale dhen në gjendje të mjerueshme.
“Është një rrugë që shërben edhe për turizëm. Që në kohë të komunizmit nuk është ndërhyrë në këtë rrugë. Turistët kanë shumë ankesa, në sezon veror vijnë më shumë se 3000 turistë. Kjo është “rruga e vdekjes”.
Nëse rruga bëhet, mund të zhvillojmë edhe turizmin malor. Sot është protestë paqësore, nesër e mbrapa bllokojmë rrugën, nuk do të lejojmë asnjë makinë të kalojë. Anullimi i projektit është i papranueshëm. Kjo rrugë lidh disa zona.” – shprehen banorët e zonës.
Banorët paralajmëruan bllokimin e rrugës në qoftë se kërkesa e tyre nuk merret parasysh nga institucionet përgjegjëse.
Discussion about this post