Kryetari i Partisë Demokratike në Durrës, Adrian Gashi, ka reaguar për situatën e krijuar këtë të hënë në universitetin “Aleksandër Moisiu”, ku sipas tij, studentë që kanë kërkuar të hyjnë në ambientet e universitetit janë shoqëruar në komisariat.
Ngjarja vjen në ditën e parë të vitit akademik, teksa në UAMD është parashikuar edhe inaugurimi i godinës së re të Fakultetit të Studimeve Profesionale, ku i pranishëm do të jetë dhe Kryeministri Edi Rama.
Gashi denoncon se studentët janë penguar të hyjnë në universitet për shkak të masave të marra për zhvillimin e ceremonisë, ndërsa disa prej tyre, sipas tij, janë shoqëruar në polici pasi kanë kërkuar të futen në auditorë.
“Siguria e Kryeministrit është përgjegjësi e institucioneve. Mësimi është e drejtë e studentëve. Njëra nuk mund të garantohet duke cenuar tjetrën”, shprehet Gashi.
Kreu i PD Durrës ngre pyetjen se përse studentët duhet të përballen me masa të tilla pikërisht në ditën e parë të vitit akademik.
“Studentë që kanë kërkuar thjesht të hyjnë në universitet janë shoqëruar në komisariat. Po çfarë rreziku paraqet një student që kërkon të hyjë në auditor ditën e parë të shkollës?”, deklaron ai.
Në përfundim, Gashi thekson se aktivitetet institucionale nuk duhet të pengojnë funksionimin normal të universitetit dhe pjesëmarrjen e studentëve në mësim.
“Universiteti nuk është skenografi për inaugurime. Është, para së gjithash, shtëpia e studentëve”, përfundon Gashi.
Discussion about this post