Banorët protestues të fshatrave të Krujës që kërkojnë një rrugë hyrëse-dalëse për bizneset e tyre në autostradën Thumanë-Kashar, janë ulur sot në mesditë në rrugë dhe e kanë bllokuar aksin duke hedhur parulla në drejtim të qeverisë.
Ata janë shprehur qartë se këtë protestë po e bëjnë për familjet e tyre, pasi kanë bizneset në këtë aks dhe projekti jotransparent nuk u jep asnjë mundësi se si do të shkojnë në bizneset që kanë aty pranë.
Policia ka krijuar një kordon përreth tyre dhe e ndjek protestën në heshtje për momentin.
Banorët shprehen qartë se nuk janë kundër projektit, por ai duhet të jetë në shërbim të qytetarëve.
“Në Evropë shkohet me rrugë të hapura, jo me rrugë të mbyllura” thuhet në njërën nga parullat që ata ngritur.
Ndërsa kryetari i degës së PD në Krujë, tha: “Siç e shikoni, ky segment rrugor Thumanë-Kashar ka bllokuar me qindra banorë për vetëm një hyrje dalje që kërkojnë banorët. Një hyrje-dalje që është shumë e drejtë për banorët. Të izolohen banorët e Thumanës, të Fushë Krujës, të Krujës, të Niklës, Bubqit, të gjithë zonat, kjo është e padrejtë.
I bëjmë thirrje kryeministrit Edi Rama të marrë masa dhe të hapë rrugën e banorëve, se nuk po i kërkojnë punësim. Ky jo vetëm që s’afron punësim, por po ua mbyll të gjitha bizneset, po e izolon të gjithë zonën.
Protestuesit janë qendrestarë dhe do të jenë deri në zgjidhjen e problemit. Ne si PD do të jemi në mbështetje sa herë të na kërkojnë banorët e kësaj zone.”
Discussion about this post