Është mbyllur protesta përpara Bashkisë së Tiranës edhe për ditën e sotme. Eksponentë politikë të PD-së bënë thirrje për dorëheqje të kryebashkiakut Erion Veliaj, duke e akuzuar atë se është i përfshirë në korrupsion.
Sekretari i Përgjithshëm i Partisë së Lirisë Tedi Blushi hodhi akuza dhe në drejtim të SPAK, duke e konsideruar një insitutucion partiak, që vepron me urdhër nga qeverisja. Blushi tha se “SPAK dënoi pa prova Berishën e Metën, duke tentuar të asgjësojë opozitën”.
Ndërkaq, eksperti i ekonomisë pranë PD-së Dorian Teliti iu bëri thirrje qytetarëve që t’i thuhet “stop” korrupsionit, vjedhjes, shpopullimit, varfërisë, nëpërkëmbjes së pensionistëve.
Gjatë fjalës së mbajtur në tubim, aktivistja Adriana Kalaja u shpreh se, sot kishin sjellë një dhuratë për Erion Veliajn.
“Sot vijmë sërish këtu për javë të tjera dhe nuk bëjmë asgjë më shumë se detyrën tonë ndaj Tiranës, ndaj Shqipërisë, ndaj familjeve tona. Që ky bastard (Veliaj) dhe ai bastard që drejton Shqipërinë (Rama), donin ta shpërbënin. Donin të shpërbënin familjen, të shpërbënin Tiranën dhe Shqipërinë, pasi donin të drejtonin të qetë, pa i bezdisur askush.
Institucioni i bashkisë është plot me pisllëk.
Prandaj kemi sjellë disa sapunë që t’i marrë Erion Veliaj dhe të lahet me to. Le t’i marrë se do t’i duhen edhe për tek burgu 313 ku do të shkojë.
Nëse ndonjë polic është palë me të, le t’i marrë dhe të ja çojë edhe Ilir Prodës, sepse edhe ai shumë shpejt do të shkojë tek 313-a”, tha Adriana Kalaja.
Më pas, ajo bashkë me protestues të tjerë kanë hedhur sapunë tek dera e bashkisë së Tiranës.
Discussion about this post