Pas projektligjit që depozitoi sot në Kuvend, përmes së cilit kërkoi të bëhen publike dhe të aksesueshme të gjitha dokumentet e ish-sigurimit të shtetit, kreu i Grupit Parlamentar të PD-së, Enkelejd Alibeaj reagon sërish. Në një postim në Facebook ai thekson se të gjithë qytetarët shqiptarë kanë të drejtë të mësojnë të vërtetat e diktakturës më të egër dhe ç’njerëzore që ishte komunizmi.
Alibeaj shtoi se zbardhja e dokumenteve do t’i shërbejë të gjithë atyre që janë torturuar në kampet e regjimit komunist për të mësuar të vërtetën e dhimbshme të asaj që ishte jeta e tyre për 45 vite.
“31 vite pas rënies së regjimit komunist, qytetarët shqiptarë kanë të drejtë të mësojnë të vërtetën e asaj që ishte diktatura më e egër dhe më çnjerëzorë, jo vetëm në historinë e Shqipërisë, por edhe të Evropës e më gjerë. Zbardhja e plotë e së vërtetës lidhur me atë që ishte dhe përfaqësonte regjimi komunist nuk mund të kuptohet pa zbardhur atë pjesë të historisë që ishte ana më e errët e saj, pikërisht Sigurimi i Shtetit.
Në ato dokumente gjenden të dhëna dhe foto për fatin e mijëra shqiptarëve të pushkatuar, të gjymtuar, të torturuar, të dënuar dhe internuar në burgjet dhe kampet e regjimit komunist. Zbardhja e atyre dokumenteve do t’iu shërbejë këtyre personave, por edhe familjeve të tyre për të mësuar të vërtetën e dhimbshme të asaj që ishte jeta e tyre për 45 vite. Një popull që harron historinë e tij, është i dënuar ta përsërisë atë” – shkroi Alibeaj.
Por përveç demokratëve, edhe socialistët kanë bërë gati draftin për ta dorëzuar në Kuvend që parashikon eliminimin e të gjithave pengesave ligjore që i mohojnë Autoritetit të Dosjeve të drejtën për të verifikuar politikanët.
“Është një domosdoshmëri dhe një simbolikë e fuqishme për të dënuar krimet e të kaluarës. Për t’u siguruar që historia të mos përsëritet dhe arritjen e paqes sociale duhet që bashkëpunëtorët e sistemit të mëparshëm të mos të kenë mundësi të jenë pjesë e vendimmarrjes i çfarëdo niveli qoftë ai.- u shpreh Klotilda Bushka.
Discussion about this post