Pas vendimit të PS për rrëzimin e komisionit hetimor të PD ndaj çështjes “Becchetti” , ka reaguar kryedemokarti Lulzim Basha. Nga Selia e PD, Basha ka përsëritur qëndrimin e Partisë Demokratike se është e vendosur për ngritjen e komisionit hetimor, duke iu përgjigjur kështu Partisë Socialiste e cila e konsideroi si jo në interes të Shqipërisë.
Sipas tij, PS po gënjen veten sepse Kushtetuta ja lejon ngritjen e komisionit hetimor opozitës në këto kushte.
“Kushtetuta është shumë e qartë për komisionet hetimore. Shqiptarëve tani kanë filluar t’i merren 120 milionë euro. Kështu që Kushtetuta e thotë shumë qartë për miratimin e komisioneve hetimore”, tha Basha.
Kryetari i PD foli gjithashtu edhe për krizën energjetike, duke e konsideruar atë si krizë korrupsioni. Sipas tij të gjithë përgjegjësit duhet të ishin para drejtësisë.
“Të enjten do të zhvillohet seanca plenare e radhës, jo vetëm rendi i ditës por edhe gjendja që ka pllakosur në vend janë tregues i qartë që kemi të bëjmë jo vetëm me një krizë energjetike por me një krizë korrupsioni. Pra e kanë shitur 60-70 mln euro dhe do ta blejnë 200-220 mln euro. Në një vend normal me institucione normale sot nga i pari i sektorit, përgjegjës politikisht, tek drejtuesit famëkeq, duhet të ishin të paktën të ndjekur penalisht.
Ne nuk mund të rrimë duarkryq para kësaj situate. Do të vazhdojmë siç kemi nisur me një ofensive që ka si objektiv nevojat bazike të shqiptarëve. Unë ju ftoj juve si media, si qytetar por edhe si kryetar i opozitës që t’i drejtoni kamerat tuaja te qytetarët, që blejnë me listë. Sot ky problem është më i rëndë se kurrë.
Shteti shqiptar sot i ka të gjithë instrumentet për të marrë masa. Paratë e shtetit shpërndahen në korrupsione.
Në do të vazhdojmë me të gjitha format dhe mënyrat të bëjmë detyrën tonë karshi shqiptarëve. Buxheti i oligarkëve duhet ribërë në funksion të shqiptarëve. Një thirrje edhe një herë për institucionet e drejtësisë, ky është një nga testet kryesore. Është e shkruar e zeza mbi të bardhë që kjo është krizë korrupsioni dhe krizë energjetike”, tha Basha.
Basha nuk pranoi të fliste për përplasjen brenda PD, por tha vetëm se opozita do vazhdojë të realizojë pikat që ka paraqitur.
