Socialistët në Konferencën e Kryetarëve miratuan në mënyrë të njënshme këtë të mërkurë ngritjen e komisionit të Posaçëm për Dezinformimin, një nismë e kritikuar se do të cënojë edhe më të tej lirinë e medias në vend.
Kreu i Grupit Parlamentar të PS, Bledi Çuçi tha se komisioni me afat 1-vjeçar ka në fokus mbikëqyrjen e të gjitha përpjekjeve institucionale për të luftuar dezinformimin dhe format e tjera të ndërhyrjes së huaj në proceset demokratike në Shqipëri.
Ndërkohë, deputetët e opozitës ngritën shqetësimin se mazhorancës po i shtohet një tjetër mekanizëm për censurën ndaj medias.
“Vjen si një tentativë e dytë për të ndërhyrë në lirinë e medias. Vjen pas dështimit të paketës antishpifje, një paketë që u kundërshtua fort nga ndërkombëtarët. Ngjan me atë që ka ndodhur në Turqi, mbi fjalën demokraci u bë dhunimi me i fortë i shtyllave të demokracisë. Duhet një reflektim dhe një kujdes i madh”, tha deputeti i PD, Agron Gjekmarkaj. Ai shtoi gjithashtu se nisma e socialistëve “është një tentativë për te spostuar diskursin politik nga aferat e qeverisë”.
Një qëndrim të ngjashëm mbajtën edhe deputetë të tjerë demokratë. Gazment Bardhi, kreu i grupit parlamentar demokrat, kërkoi shtyrjen e miratimit të ngritjes së komisionit, duke u shprehur se kemi të bëjmë me një çështje sensitive që duhet të trajtohet me kujdes të veçantë.
“Këto çështje që pretendohen të trajtohen në ketë komision të posaçëm mund të trajtohen fare mire ne komisionet respektive, Komisionin e Medias apo Komisionin e Sigurisë. Pse nuk mund të trajtohen aty?! Do duhet të hiqet çdo dileme për ndërhyrje në lirinë e medias. Nëse nuk është ky qëllimi i fshehur, duhet të marrin kohën e nevojshme dhe mos e trajtojmë si një temë për konsum ditor”, tha Bardhi.
Megjithatë, kërkesat e opozitës ranë në vesh të shurdhët. Kreu i grupit parlamentar socialist, tha se “kolegët e opozitës shohin me paranojë çdo iniciative të mazhorancës”.
Në fund, me forcën e kartonit, deputetë e PS miratuan ngritjen e komisionit.
Discussion about this post