Kreu i grupit parlamentar të Partisë Demokratike, Enkelejd Alibeaj ka reaguar pas vendimit të grupit parlamentar të PS për të mos përjashtuar Orlando Rakipin, pasi i ati iu shpall non grata nga SHBA.
Në një postim në Facebook, Alibeaj shkruan se vendimi i sotëm tregoi që kryeministrit Rama e ka të pamundur të ndahet nga non grata sepse sipas tij, e ndihmojnë të mbajë pushtetin. Ndër të tjera, Alibeaj shton se kryeministri Rama dëshmoi qartë se ai është ideatori i masakrës së 25 prillit.
“Asnjë habi nga ishulli i non grata-ve. E sotmja ishte prova e radhës se Edi Rama e ka të pamundur të ndahet nga non gratat sepse vetëm falë tyre ai arrin të mbajë karrigen e kryeministrit. Vendimi i sotëm i grupit parlamentar të PS është qartas dëshmi e pushtetit dhe pengmarrjes që klubi i nongratave ka në politikën shqiptare. PD e ka denoncuar kohë më parë përfshirjen e Aqif Rakipit në procesin e blerjes së votave. Ky fakt i konfirmuar dhe nga Departamenti Amerikan i Shtetit nuk arrit ta bindë Edi Ramën dhe deputetet e tij se votat e blera për llogari të të birit duhet të jenë një alarm për ecurinë normale të parlamentarizmit. Me avokatinë e sotme ndaj Ornaldo Rakipit, kryeministri dëshmoi qartë se ai është ideatori i masakrës elektorale të 25 prillit. Zbatuesit e kësaj masakre janë grupi i non gratave që sot janë ende aktivë në strukturat e PS. Jo rastësisht dhe në zgjedhjet e pjesshme lokale të 6 marsit, PD denoncoi përfshirjen e Tom Doshit dhe Vangjush Dakos në fushatën për zgjedhjen e kryebashkiakëve”, shkruan Alibeaj.
Për vendimin e PS, reagoi edhe ish kreu demokrat Lulzim Basha, sipas të cilit, “Edi Rama është mburoja e non gratave sepse pa ta ai nuk qëndron dot në pushtet”.
Discussion about this post