Sekretariati i Etikës në Kuvend ka pezulluar me 10 ditë dy deputetët e PD-së Elda Hoti dhe Petrit Doda për kaosin gjatë seancës së djeshme në parlament. Përjashtimi i tyre me 10 ditë erdhi pas kërkesës së grupit parlamentar të Partisë Socialiste.
Gjithashtu, një kërkesë tjetër në dorë të Sekretariatit të Etikës sot, ishte dhe ajo e grupit të PD-së për përjashtimin e deputetëve socialistë, Eriom Braçe, Ilir Metaj dhe Plaurent Ndreca nga komisioni hetimor në shëndetësi. Por kjo kërkesë nuk u mor në konsideratë, pasi ishte dorëzuar jashtë afatit 48 orësh pas ngjarjes.
Partia Socialiste dërgoi në Kuvend kërkesën për marrjen e masave disiplinore, për përjashtimin e 2 deputetëve të PD, që dje në sallën e seancave plenare nuk lejuan zhvillimin normal të saj (17 Tetor).
Në shkresën e hartuar, drejtuar Sekretariatit të Etikës, kërkohet masë disiplinore për deputetët: Elda Hoti dhe Petrit Doda.
Fillimisht ishte përfshirë në diskutim për kërkesë edhe Albana Vokshi, por në fund u vendos vetëm për 2 ligjvënës.
Gjatë seancës së djeshme, Hoti u pa teksa spërkaste nga disa kuti të vogla sallën e Parlamentit dhe pengoi seancën, teksa u dyshua se ishin me përmbajtje lënde djegëse benzinë. Vetë Hoti tha se ishte aromatizues, kurse verifikimet vijojnë.
Petrit Doda u pa teksa mblidhte karriget e Kuvendit pranë foltores dhe pengonte zhvillimin normal të punimeve.
Grupi i PS konstaton se Hoti hapi shishet ku dyshohej se kishte lëndë të rrezikshme duke spërkatur sallën dhe rrezikuar sigurinë e deputetëve, e ndihmuar edhe nga kolegu Doda gjithashtu.
Po kështu Hoti, sipas procesverbalit dhe pamjeve, ka bllokuar fjalimin e deputetit Petro Koçi, duke i hequr kartën elektronike dhe penguar, sikurse tentoi edhe me deputetin Eduart Shalsi.
Gjithashtu edhe deputetja Albana Vokshi sulmoi verbalisht dhe tentoi t’i afrohej fizikisht apo penguar kolegët e saj të mazhorancës, veçanërisht Petro Koçin. Por në fund PS ka vendosur që të përfshihet në listën për ndëshkim me masë disiplinore.
Më parë janë përjashtuar me 10-60 ditë edhe 24 deputetë të opozitës, pas kaosi në seancën e 30 Shtatorit dhe djegies së karrigeve të Kuvendit.
gijotina.com/
Discussion about this post