Opozita, ashtu siç kishte paralajmëruar, protestoi sot në Kuvend, duke bllokuar nisjen e seancës.
Deputetë të opozitës hynë në sallën e seancave plenare rreth orës 09:00 të mëngjesit duke u ulur në vendet e rezervuara për ministrat, duke krijuar kështu pamundësi për nisjen dhe zhvillimin e seancës.
Dhe si pasojë e këtyre veprimeve, me propozim të Grupit Parlamentar socialist, u vendos që 23 nga 26 deputetë të opozitës të përjashtoheshin nga punimet e Parlamentit për 10 ditë.
Por duket se vendimi i përjashtimit do të mbetet vetëm në letër, pasi një mesazh i Bledi Çuçit, kreut të Grupit Parlamentar socialist, njofton kolegët e tij të mazhorancës se seanca e rradhës do të mbahet më 30 tetor.
“Kolegë nuk do te zhvillojmë seancë këtë javë. Seanca e radhës , të hënën, më 30 Tetor, për çështjet e zgjedhësve. Vijojmë në ditët në vazhdim nëpër zona, me vendimet që u morën në mbledhjen e Grupit”, thuhet në mesazh.
Kjo do të thotë se vendimi për përjashtimin e 23 deputetëve nuk do të ketë ndonjë vlerë në atë që opozita e njoftoi si nisjen e aksionit opozitar, pasi në seancën e ardhshme, atë të 30 tetorit, grupi parlamentar i PD-së do të jetë sërish i plotë.
Discussion about this post