Skandali “Aktiv1sti” është një tjetër që ka zbuluar mënyrën e ulët të keqqeverisjes së mazhorancës. Eksperti Gent Progni, i cili ka denoncuar rastin, ka shpjeguar se aplikacioni detyron punonjësit e administratës publike që të vihen në shërbim të kryeministrit Edi Rama, ministrave të qeverisë dhe drejtuesve të lartë të institucioneve për të rritur aktivitetin e tyre në rrjetet sociale.
Për më tepër, aplikacioni shkel të drejtat e privatësisë pasi ka akses te rrjetet sociale të punonjësve që detyrohen të regjistrohen, deri te leximi i mesazheve.
Në vazhdën e denoncimeve për rastin, së fundmi është publikuar një listë me personat që kishin shkarkuar aplikacionin, ku ishin edhe prokurorë dhe gjyqtarë të “drejtësisë së re”.
Për rastin ka reaguar dhe opozita që ka kërkuar hetim nga organet e drejtësisë. Mazhoranca, nga ana tjetër, është mundur të shfajësohet, duke pretenduar se aplikacioni është një formë aktivizmi dhe nuk shkelet privatësia. Megjithatë, mesazhet e shumta të punonjësve të administratës hedhin poshtë pretendimet e mazhorancës. Ata kanë zbuluar se si kërcënohen me pushim nga puna nëse nuk i nënshtrohen urdhrave të partisë.
Vetë Edi Rama, përmes një postimi në rrjetet sociale disa ditë më parë, kërcënoi me ndjekje penale publikuesit e listës së lartpërmendur.
Kërcënimi
Këtë të Premte, kërcënimi u përsërit nga Partia Socialiste, që kë kërkoi nga mediat eleminimin e gjurmëve të skandalit.
“Partia Socialiste e Shqipërisë kërkon nga mediat audiovizive, mediat elektronike dhe të gjitha platformat e portalet online që të refuzojnë në çdo rast publikimin e të dhënave të pjesshme apo të plota qofshin ato, që pretendohet se janë siguruar nga ndërhyrja e kundraligjshme në paltformën elektronike ‘Aktiv1st’, pronë e P.S.SH si dhe të fshijnë cdo informacion nga përmbajtja e faqeve të tyre të internetit të publikuar deri tani”, thotë PS.
Në një kërkesë drejtuar mediave, PS shprehet më tej se “do të ndjekë në mënyrë rigoroze këtë rast dhe do të procedojë sipas ligjit për hetime të mëtejshme në Prokurorinë pranë Gjykatës së Rrethit Gjyqësor Tiranë, për çdo media e cila do të vazhdojë të kryejë publikimet e këtyre të dhënave edhe pas kësaj kërkese”, që sipas partisë në pushtet janë “në shkelje të ligjit”.
Një kërcënim i hapur ky ndaj mediave që qeveria dhe veçanërisht kryeministri Edi Rama i sulmon vazhdimisht sa herë që i zbulojnë skandalet.
Discussion about this post