Partia Socialiste ka vendosur të distancohet nga zyrtarët e saj që ditët e fundit janë arrestuar pas hetimeve të SPAK.
Kreu i grupit Parlamentar të PS, Taulant Balla inkurajoi organet e drejtësisë të godasin si rastin e kryebashkiakut të Lushnjes, Fatos Tushe dhe ish-zv.ministres Rovena Voda.
“Fatos Tushe nuk është më pjesë e PS, ka detyrimin ligjor të bëjë një betejë të tij. Edhe zonja në fjalë që ju i referoheni,” thotë ai.
Përgjegjësitë tha se për këdo janë personale teksa zhveshi PS nga veprimet e jashtëligjshme të të zgjedhurve të saj.
“PS nuk mund të bëhet pis nga asnjë individ që në një moment të caktuar ka marrë një mandat nga PS. Përgjegjësia është vetëm personale,” shprehet ai.
Për Ballën, veprimet e SPAK përfaqësojnë drejtësinë që shqiptarët kanë dashur duke goditur në dy krahët e politikës.
“Drejtësia po godet sa majtas dhe djathtas, sa lart sa poshtë,” thotë ai.
Për kreun e grupit parlamentar të PS, ndryshe nga standarti i PS, demokratët kanë vendosur të mos reagojnë për zyrtarët e PD që janë dënuar dhe po hetohen nga SPAK.
