Pse Ardi Veliu me një duzinë policësh? Mjaftonte një përmbarues

Nga Naim Noka

Në orët e para të mëngjesit, Edi Rama na dha pamjen më të pastër të fytyrës së tij politike: një njeri që nuk e duron dot fjalën e lirë dhe që e sheh policinë jo si institucion të shtetit, por si trupë private për të shuar çdo zë jashtë kontrollit të tij. Ajo që ndodhi te godina e News24, Panorama, BalkanWeb dhe Gazeta Shqiptare nuk ishte një procedurë administrative. Ishte një operacion demonstrimi force, i menduar në errësirë dhe i zbatuar me shpejtësinë e një aksioni mafioz. Në fakt  bosi i madh Hysenbelliu  duhej të kishte nje studio alternative dreqi ta hajë edhe pse në fushatë e mikloi Padishahun. Inati i të Madhit është lunatik dhe i keq! Dhjetëra kolegë do të mbeten pa punë! Irfani edhe mund dhe do të nënshtrohet ndaj kryeministrit Rama por kolegët tanë do të mbeten pa rroga zyrtarisht.

Por në vend të një përmbaruesi civil, në skenë na u shfaq Ardi Veliu me një duzinë policësh. Veliu nuk ka nevojë për prezantim: nga kryepolic, zv.ministër, në krye të AMP-së, e sot drejtor i një kompanie shtetërore armësh, karriera e tij është një listë shërbimesh pa kushte ndaj Edi Ramës.  Veliu nuk prodhoi dot armë sot, por përdori policinë si armë kundër medias.

Por le të jemi të qartë: Veliu është thjesht ushtari. Ky është skenar i vetë Ramës. Në Shqipërinë e tij, nuk ekziston kufi mes ekzekutivit dhe policisë; uniformat blu janë thjesht degë e pushtetit personal të kryeministrit. Urdhri vjen nga lart, dhe ligji nuk ka asnjë vend në këtë ekuacion.

Ky nuk është më presion nën rrogoz. Nuk është as kapje e reklamave apo kontroll i tenderave. Ky është sulm i zhveshur: një goditje e hapur ndaj fjalës së lirë, për të treguar kush është “pronari” i territorit. Sot është News24. Nesër mund të jetë çdo media tjetër që nuk e këndon himnin në kor.

Historia e ka treguar qartë: askush nuk e fiton dot luftën me median. Por Rama e nis sepse frika nga e vërteta është më e madhe se frika nga humbja. Ai e di që pushteti nuk zgjat përgjithmonë, por kur ke ndërtuar një sistem ku arroganca ka zëvendësuar arsyen, çdo mjet force duket i justifikuar.

Në fund, kryeministri duhet ta kuptojë se fjala e lirë nuk asgjësohet me një duzinë   policësh. Çdo derë që i mbyll medias sot, do t’i hapë nesër dhjetë të tjera. Dhe atë ditë, as uniformat, as Ardi Veliu, e aq më pak Ilir Proda me bandat e tij, nuk do ta mbrojnë dot nga ajo që sot përpiqet të mbyllë: e vërteta.