Juventusi është lidhur me një mori sulmuesish në janar dhe Lorenzo Bettoni beson se Mauro Icardi do të ishte më i përshtatshmi për të zgjidhur problemet e Max Allegrit.
Me vetëm 23 gola të shënuar në 17 ndeshje të Serisë A, Juventus ka rekordin më të keq të sulmit në mesin e dhjetë klubeve më të mira në Itali. Duke parë pjesën e dytë të renditjes, ka klube si Bologna, Hellas Verona, Sassuolo dhe Sampdoria që kanë gjetur rrjetën më shpesh se ‘Zonja e Vjetër’ këtë sezon.
Paulo Dybala është golashënuesi më i mirë i tyre me tetë gola në 17 paraqitje, i ndjekur nga Alvaro Morata i cili ka gjashtë në 21 ndeshje.
Një sulmues i ri është prioriteti i bardhezinjve në afatin kalimtar të janarit. Pavarësisht se Dusan Vlahovic është objektivi i tyre nr.1, Juventusi nuk duket se ka fuqinë financiare për të marrë yllin e Fiorentinës.
Të tillë si Mauro Icardi, Edinson Cavani, Pierre-Emerick Aubameyang, Gianluca Scamacca dhe Anthony Martial janë lidhur me një lëvizje në Torino në janar, por kush do të ishte alternativa më e mirë për gjigantët e Serie A?
Juventusi ka nevojë për një sulmues që mund të ketë një ndikim të menjëhershëm në fushë pa ndikuar në financat e tyre. Objektivi i tyre është ta bëjnë ekipin më konkurrues pa shpenzuar para të çmendura dhe madje duke u përpjekur të ulin faturën e pagave duke shitur disa nga të përjashtuarit e tyre, duke përfshirë Aaron Ramsey, Arthur dhe Dejan Kulusevski.
Icardi duket i përshtatshëm jo vetëm për përvojën e tij në Serie A, por edhe për vlerën e transferimit dhe pagën e tij.
Ish-kapiteni i Interit shënoi 124 gola në 219 paraqitje me ‘Zikaltwrit’, ndwrsa tashmw nuk po merr kohë të rregullt për të luajtur në Paris. Ai ka shënuar vetëm tre gola në 18 paraqitje, duke filluar vetëm gjashtë ndeshje në Ligue 1.
Paga e tij është rreth 9 milionë euro në vit, por është ende më e ulët se ajo e Martial dhe Aubameyang (15 milionë euro në vit) dhe (Cavani 13 milionë euro në vit). Scamacca nuk merr aq shumë sa ata, por Sassuolo nuk dëshiron ta shesë në huazim me një opsion blerjeje, as në janar dhe as në fund të sezonit.
Sulmuesi italian ka shënuar pesë gola në 17 paraqitje në Serie A këtë sezon dhe kërkesat e Sassuolo janë rreth 40 milionë euro. Një tarifë që Juventusi nuk mund ta përballojë në janar.
Nga ana tjetër, PSG mund të jetë i hapur për të shitur Icardin në huazim me një opsion ose një detyrim për të blerë, veçanërisht nëse Icardi kërkon të largohet nga klubi.
Vlen të theksohet se duke nënshkruar me Icardin, Martial ose Aubameyang, Juventusi do të merrte ulje dhe lehtësim taksash falë të ashtuquajturit “Dekreti i Rritjes”.
Javën e kaluar, trajneri i PSG-së, Mauricio Pochetino tha se shpreson që Icardi të qëndrojë në Paris, megjithëse është ‘ende herët’ për të folur për afatin kalimtar të dimrit.
Ndryshe nga Martial, Icardi është një qendërsulmues klasik që do të përshtatej menjëherë me futbollin e Serisë A, pasi ka luajtur tashmë për shumë vite në Itali.
Martial është diçka ndërmjet një qendërsulmuesi dhe një anësori sulmues dhe ka shënuar më shumë se dhjetë gola në Premier League vetëm dy herë në karrierën e tij: 11 në 2015-16 dhe 17 në 2019-2020.
Ai është një sulmues emocionues me hapësirë të mjaftueshme për përmirësim, por Juventusi nuk mund të mendojë më për të ardhmen afatgjatë dhe duhet të zgjidhë problemet e tyre këtu dhe tani.
Ata janë tetë pikë pas një vendi në Champions League dhe janë të dëshpëruar për të shënuar më shumë gola. Kjo është arsyeja pse ata nuk mund të mbështeten te dikush që luan në Serie A për herë të parë në karrierën e tij dhe nuk ka shënuar kurrë vazhdimisht. Kjo është arsyeja pse Juventusi ka nevojë për Icardin shumë më tepër sesa për Martial./K.T/Gijotina.com
Discussion about this post