Kriza në PD ka nevojë për vullnet politik që të zgjidhet, tha Gazment Bardhi, kreu i Grupit Parlamentar në studion e emisionit “Open”.
Sipas tij, kjo situatë nuk ka asnjë diskutim që e ka dobësuar Partinë Demokratike. Bardhi akuzoi Lulzim Bashën që herë pas herë aktivizon debatin e brendshëm në PD, duke provokuar përplasjet në këtë parti.
“Nuk kam ndërmend të merrem me Lulzim Bashën. Ai ka në agjendë të mbajë opozitën në konflikt, po përpiqet të prodhojë lajme për përplasjet në PD. Një javë më parë çoi në Kuvend një letër për përjashtimin e 11 deputetëve, këtë të enjte do të çojë letër që më përjashton mua”, tha Bardhi.
Sipas tij, kjo situatë në PD duhet të marrë fund. “Ne kemi mendimin tonë, nuk biem dakort me z. Basha, nuk biem dakort me Sali Berishën, pse nuk paskemi ne të drejtë të kemi mendime të ndryshme”, tha Bardhi.
Ai tha se në PD janë disa palë që mendojnë ndryshe për disa zgjidhje. “Unë jam Kryetar i Grupit Parlamentar të PD-së i zgjedhur nga shumica e kolegëve të tij. Z.Basha është deputet i PD-së, i cili nuk më ka votuar mua. Shumë shpejt do të kemi zgjidhje për shumë problematikat që ka kjo parti. Sot jemi në një tryezë të gjithë bashkë, kemi diskutime shumë të hapura”, tha Bardhi.
Sipas tij, sot po ndërtojmë një agjendë të përbashkët në Kuvend jo thjesht të PD-së, por të gjithë opozitës.
Discussion about this post