Takimi mes presidentit të Turqisë, Recep Tayyip Erdogan, dhe kryeministrit grek, Kyriakos Mitsotakis, i parashikuar të zhvillohej të martën në orën 21:00 në kuadër të Asamblesë së Përgjithshme të OKB-së në Nju Jork, është anuluar.
Mediat greke raportojnë se anulimi ka ardhur për shkak të palës turke, vetëm katër orë para kohës së planifikuar për takimin.
Në komunikimet mes dy palëve, përfshirë nivelet ministrore dhe ato të këshilltarëve diplomatikë, u bë përpjekje për të shtyrë takimin për një orar tjetër. Megjithatë, pala turke nuk arriti të gjejë hapësirë në axhendën e presidentit Erdogan, i cili sonte udhëton drejt Uashingtonit për një takim me ish-presidentin amerikan, Donald Trump, ditën e mërkurë.
Burime zyrtare greke e kanë konfirmuar anulimin, ndërsa shtojnë se takimi ishte finalizuar më herët dhe ishte bërë publik sipas praktikës normale nga pala greke.
Sipas tyre, nuk qëndron pretendimi se publikimi i takimit nga Athina ishte arsyeja e anulimit, pasi Turqia kishte pranuar zyrtarisht që javën e kaluar.
Nga burime pranë qeverisë greke thuhet se nuk përjashtohet mundësia që anulimi të jetë një lëvizje taktike e palës turke, në sfond të tensioneve të kohëve të fundit mes dy vendeve.
Në këtë kuadër përmenden zhvillimet në lidhje me hapësirën detare, parqet detare, energjinë dhe rolin grek në Libinë perëndimore.
Në të njëjtën kohë, Athina ka shprehur shqetësim për rrjedhjet selektive të informacionit në median turke Milliyet, e cila shkruante se Erdogan e kishte anuluar takimin për shkak të publikimit të tij nga pala greke.
Sipas burimeve nga Nju Jorku, argumenti nuk qëndron, pasi Turqia nuk e kundërshtoi publikimin në kohën kur u bë.
Megjithatë, burime nga Athina lënë të hapur mundësinë për një takim të mundshëm në margjinat e takimit të Komunitetit Politik Evropian që zhvillohet më 2 tetor në Kopenhagen – nëse presidenti turk konfirmon pjesëmarrjen.
Discussion about this post