Publikimi i pagave, Kryemadhi: Rama u bën presion popullit të thjeshtë me rrogat

Kryetarja e LSI-së, Monika Kryemadhi ka komentuar vendimin e qeverisë për të bërë publike pagat e shqiptarëve. Në një reagim në rrjetin social Facebook, Kryemadhi e cilëson Ramën si kryeministër të incineratorëve që u bën presion shqiptarëve duke u kujtuar rrogat dhe makinat e thjeshta.

“Kryeministri i inceneratorëve u bën presion shqiptarëve nga banaqet e televizioneve, duke i kujtuar rrogat dhe makinat e popullit të thjeshtë.
Ndërkohë,
AM Co & Co me bashkëpronar Arben dhe Marika Përlala, me paga nga 250 €, është vetëm njëra nga kompanitë e përdorura nga Klodian Zoto, për të realizuar evazion fiskal duke fryrë kostot e punimeve të koncesonit të inceneratorëve, si dhe për përvetësimin e paligjshëm të TVSH.

Vetëm kjo kompani me dy punojës ka faturuar skemën e inceneratorëve 9 milionë dollarë.
A vepron ligji kur evazionin dhe krimin financiar e kryejnë njerëz të strehuar nën ‘ombrellën’ e kryeministrisë?”, shkruan Monika.