Deputetja e PD, Albana Vokshi, ka reaguar pas publikimit të skandalit me pagat. Përmes një postimi në Facebook, ajo është shprehur se janë të njëjtat lista si ato të patronazhistëve. Teksa akuzoi kryeministrin Rama si urdhëruesi dhe shpërndarësi i këtyre skandaleve, Vokshi tha se listat janë përdorur me qëllim presionin ndaj qytetarëve gjatë zgjedhjeve.
“Skandali me publikimin e pagave, vijim i #skandalit të #patronazhistëve! Janë të njëjtat lista, ato të #pazronazhistëve!! Janë prodhuar, shpëndarë me urdhër të Edi Ramës. Janë përdorur nga të gjitha shtabet e kandidatëve të PS gjatë fushatës elektorale.
Me këto lista i është bërë presion e janë shantazhuar bizneset, punonjësit e tyre, punonjësit e administratës, mjekët, infermierët, mësuesit…të gjithëve… E kam denoncuar që para zgjedhjeve të 25 prillit përdorimin e të dhënave personale: numrin e kartës së identitetit, email, numrin e celularit, adresa e shtëpisë, vendi punës, paga, mjeku familjes, check -up, shkolla e fëmijëve, mësuesit e fëmijëve etj etj etj. A mendoni që një operacion i tillë i grumbullimit të të dhënave nga të gjitha institucionet do të bëhej për urdhër të Edi Ramës? Janë të njëjtat lista! Ato të patronazhistëve”, shprehet ajo.
E revoltuar Vokshi i bën thirrje SPAK të nisë hetimet për këtë çështje, po së pari të kalojë në “sitë” Edi Ramën. “SPAK duhet të fillojë hetimin nga Edi Rama. Nëse SPAK do kishte reaguar prej kohësh, që kur denoncuam sistemin e patronazhistëve, shqiptarët sot do të ishin më të mbrojtur”, shkruan Vokshi në rrjetin social Facebook. Ndërsa kujtojmë se reagimet nga opozita sot kanë qenë në të njëjtën linjë duke pretenduar se kjo ngjarje është puna e patronazhistëve.
Discussion about this post