Ndërkohë që çdo ditë vazhdojnë debatet në komisionin Hetimor për Inceneratorët, deri më tani nuk është marrë dëshmia e asnjë nga personave që punojnë atje. Kështu ditën e sotme disa prej punëtorëve të inceneratorit të Elbasanit treguan për mediat se nëse flasin për problematikat që hasin, kompania do t’i heqë nga puna.
Ata kanë dalë sot në protestë dhe kanë treguar se shumë herë kanë heshtur për shkak të kërcënimeve që iu janë bërë. Më tutje treguan se kanë 2 muaj pa marrë pagat, ndërsa kërkuan që media të raportojë sa më shumë këtë situatë.
“Kemi 2 muaj punojmë natë e ditë e zihemi për bidonët. Për ne nuk paska lekë. Jam pa bukë sot. Tjetri do lekët e qirave. Na bëjnë edhe presion. Nëse dilni në media do iu heqim nga puna. Ca pune iu prishim ne atyre. Iu bëjmë thirrje gazetarëve të marrin masa. Të gjithë punëtorët s’kemi marrë lekë”, tha njëri prej tyre.
Një tjetër shprehet se prej kohësh, kompania i mban me premtime për afatet e dorëzimit të pagave dhe ende shpresojnë. “Jam vetë i 8-të në shtëpi. Këta thonë në këtë datë sot e nesër. Kemi dal se kemi dy muaj pa marrë rrogat”. Na kanë thënë që do i marrim. Ne rrimë me shpresa. Do vijmë prapë këtu”, tregoi një tjetër punëtor i landfilli të Elbasanit. Një përfaqësues i kompanisë që zotëron landfillin shtoi se asnjëri prej punëtorëve nuk do të flasë.
Discussion about this post