Pas ngjarjes tragjike të ndodhur ditën e djeshme në rrugën “Brigada VIII”, tek ish-Blloku, ku një punëtor ndërtimi humbi jetën pasi ra nga lartësia gjatë punës në një pallat në ndërtim, Policia e Tiranës ka ndërmarrë masa konkrete.
Drejtoria Vendore e Policisë Tiranë, përmes specialistëve për Hetimin e Krimeve të Komisariatit Nr. 2, ka arrestuar shtetasin Dario Hoxha, 32 vjeç, me detyrë inxhinier ndërtimi. Po ashtu, janë shpallur në kërkim administrator i firmës ndërtuese, shtetasi E. K., 34 vjeç, si dhe drejtuesi teknik, shtetasi R. J., 75 vjeç.
Sipas hetimeve paraprake, dyshohet se ngjarja e rëndë ka ardhur si pasojë e shkeljes së rregullave të mbrojtjes në punë, çka solli rrëzimin fatal të shtetasit të huaj V. N., 47 vjeç, me origjinë nga Bosnja dhe Hercegovina.
Punëtori kishte rënë nga një lartësi e konsiderueshme gjatë kryerjes së detyrës së tij dhe kishte ndërruar jetë në vendngjarje.
Grupi hetimor dhe shërbimet e Policisë ndodhen në vend për të sqaruar të gjitha rrethanat e ngjarjes dhe për të hetuar nëse janë respektuar standardet ligjore të sigurisë në punë.
Ndërkohë, vijon puna për kapjen e dy shtetasve të shpallur në kërkim.
gijotina.com/
Discussion about this post