Për më shumë se tre muaj me radhë, punonjës të shumtë aktualë dhe ish-punonjës të kompanisë “Biote”, e specializuar në prodhimin e dyshekëve, denoncojnë vonesa sistematike në pagesa, trajtim poshtërues dhe largime të padrejta nga puna. Në qendër të akuzave është administratori i kompanisë, Kreshnik Leskaj një figurë që tashmë përflitet jo për cilësinë e produkteve, por për abuzimin me të drejtat bazë të punëtorëve.
“Pagat? Ende nuk i kemi marrë…”
Një muaj pas publikimit të parë nga portali JOQ Albania, ku denoncimet e punonjësve u shfaqën për herë të parë në publik, situata nuk ka ndryshuar. Madje është rënduar.
“Kam për të marrë më shumë se kushdo tjetër. Askush nga stafi nuk më ka kontaktuar për pagesën,” thotë një ish-punonjës për redaksinë e Publik.al. “Janë mbi 20 punonjës në këtë gjendje, ndoshta edhe më shumë.”
Të tjerë e përshkruajnë “Biote-n” si një kompani ku ofendimet, shfrytëzimi dhe poshtërimi janë më të zakonshëm se një kontratë pune e respektuar.
“Kreshniku i trajton punonjësit si lecka, nuk e di çfarë mendon se është, por nuk është as pronar, as njeri i qytetëruar. Mua më larguan pa asnjë motiv, më lanë pa pagë dhe pa sqarim,” shkruan një tjetër denoncues.
Kompania përgjigjet: Ne jemi viktima të shantazhit
Përmes një reagimi të gjatë dhe të strukturuar në stil propagandistik, kompania “Biote” pretendon se është viktimë e një fushate shpifjesh të orkestruar nga persona me interesa të errëta dhe portale “që duan të shantazhojnë në emër të popullit”.
Ata thonë se punonjësit kanë firmosur kontrata të rregullta, me ndalime për punë jashtë orarit apo pagesa “në dorë”. Ata akuzojnë disa nga ish-punonjësit si “të dënuar për vjedhje”, dhe njoftojnë se i kanë paditur në gjykatë. Më tej, e cilësojnë fenomenin si një “histeri patologjike”, duke iu referuar denoncimeve si sulme të organizuara që sipas tyre kanë për qëllim të “dëmtojnë emrin e mirë të kompanisë”.
Por faktet flasin vetë: pagat nuk janë dhënë, institucionet nuk kanë ndërhyrë, dhe punonjësit jo një, jo dy, por dhjetëra e akuzojnë njëzëri këtë kompani për shkelje të rëndë të Kodit të Punës.
Heshtje institucionale
Skandali i “Biote”-s nuk është më një çështje brenda një fabrike. Ai është tashmë një test për shtetin dhe për funksionimin e institucioneve që duhet të mbrojnë të drejtat e punëtorëve.
Inspektorati i Punës dhe Tatimet duhet të kishin ndërhyrë. Ministria e Financave dhe ajo e Ekonomisë duhet të kishin hetuar pagat me dy bordero, pagesat në dorë dhe kontratat që shkelin standardet minimale të punësimit.
Por jo në Shqipërinë e vitit 2025, edhe kur një kompani përballet me akuza të rënda dhe të përsëritura, askush nuk lëviz, përveç punëtorëve – të cilët largohen me kokën ulur, pa rrogë dhe pa drejtësi.
/Publik.al/
Discussion about this post