“Punonjësit” e Kredo.al mashtrojnë të moshuarin në Elbasan, arrestohet 1 person, 2 në kërkim

Një person është arrestuar dhe dy të tjerë janë shpallur në kërkim në Elbasan, pasi kanë mashtruar një të moshuar dhe i kanë marrë një shumë të konsiderueshëme parash. Mësohet se 3 të rinjtë të moshës 21 dhe 23 vjeç në bashkëpunim me njëri-tjetrin, janë shtirur si punonjës të një fondacioni që krijon lehtësira për të marrë kredi dhe  kanë mashtruar shtetasin R. B., 65 vjeç, banues në Elbasan, duke i kërkuar një shumë parash.

Të rinjtë i kanë thënë të moshuarit se janë punonjës të “Kredo.al” dhe fare lehtë me një pagesë të caktuar mund të marrë një kredi pa kritere shtesë. I moshuari  i ka besuar dhe iu ka dhënë paratë të rinjve, më pas ka denoncuar rastin në polici. Nga kontrolli i kryer policia ka arrestuar njërin prej tyre ndërsa dy të tjerët janë shpallur në kërkim. Tre të rinjtë akuzohen për veprën penale “Mashtrim me kredi”, ndërsa prokuroria po vazhdon hetimet për zbardhjen e ngjarjes.