Rruga e Kombit po përballet me një qarkullim të shtuar automjetesh në ditët e fundit të gushtit, ndërsa shumë qytetarë nga Kosova kanë zgjedhur bregdetin shqiptar për të kaluar ditët e mbetura të sezonit veror.
Trafiku është i dukshëm veçanërisht në segmentin nga Morini deri në Pikën e Pagesës, ku numri i automjeteve në lëvizje është rritur ndjeshëm. Për shumë prej pushuesve nga Kosova, Rruga e Kombit mbetet aksi kryesor për të mbërritur në destinacionet turistike përgjatë bregdetit shqiptar.
Fluks i lartë është regjistruar edhe në pikën kufitare të Morinit, ku qindra mjete po hyjnë drejt Shqipërisë. Për përballimin e lëvizjes së shtuar të udhëtarëve dhe automjeteve, në këtë pikë kufitare po punohet me të gjitha sportelet në dispozicion.
Masa të ngjashme janë marrë edhe në Pikën e Pagesës së Rrugës së Kombit. Qëllimi është shmangia e krijimit të radhëve dhe garantimi i një lëvizjeje sa më të shpejtë përgjatë aksit.
Qarkullimi i lartë pritet të vijojë edhe gjatë orëve në vazhdim, ndërsa qytetarë të shumtë nga Kosova vijojnë t’i drejtohen Shqipërisë për të shfrytëzuar ditët e fundit të gushtit në bregdet.
Discussion about this post