Pas thirrjeve të Presidentit të Ukrainës, Volodymyr Zelensky, për bisedime, ka pasur më në fund një reagim zyrtar nga Moska. Zëdhënësi i Kremlinit, Dmitry Peskov, citohet të ketë thënë për mediat ruse se Vladimir Putin, është gati të dërgojë një delegacion të zyrtarëve të rangut të lartë për bisedime me Kievin, të cilat sipas Moskës duhet të mbahen në kryeqytetin e Bjellorusisë, Minsk.
Minsku është i rëndësishëm sepse aty u nënshkruan marrëveshje për t’i dhënë fund konfliktit në lindje të Ukrainës që shpërtheu në vitin 2014.
Më herët, presidenti ukrainas doli në një tjetër deklaratë ku i kërkoi Putin të ulen në bisedime për të mos humbur më jetë njerëzish, ndërsa u tregua i ashpër me Perëndimin se nuk bëri asgjë për të ndaluar luftën por u mjaftuan me sanksione.
Zelensky gjithashtu shtoi se nuk është tepër vonë për të ndaluar “agresionin” rus nëse liderët evropianë veprojnë me shpejtësi dhe u bën thirrje qytetarëve në mbarë BE të protestojnë dhe të detyrojnë qeveritë e tyre në veprime më vendimtare.
Discussion about this post