Vladimir Putin e ka krahasuar pushtimin rus të Ukrainës me luftën kundër Gjermanisë naziste, në një fjalim për të shënuar 80-vjetorin e përfundimit të Betejës së Stalingradit. Duke përmendur vendimin e Gjermanisë për të dërguar tanke “Leopard 2” në Ukrainë, ai tha se historia po përsëritej.
“Është e pabesueshme, por e vërtetë. Ne përsëri po kërcënohemi nga tanket gjermane Leopard” – tha Putin.
Gjermania është një nga vendet e shumta që ndihmon Ukrainën të mbrojë territorin e saj. Rusia nisi pushtimin e saj të përgjakshëm në shkallë të plotë pothuajse 1 vit më parë, duke nxitur vendet perëndimore të dërgojnë armë dhe ndihmë për qeverinë në Kiev.
Duke folur në Volgograd – emri modern i Stalingradit – Putin la të kuptohej se ai mund të kërkonte të lëvizte përtej armëve konvencionale.
“Ata që shpresojnë të mposhtin Rusinë në fushën e betejës nuk e kuptojnë, me sa duket, se një luftë moderne me Rusinë do të jetë shumë ndryshe për ta”, – tha lideri rus 70-vjeçar. “Ne nuk po dërgojmë tanket tona në kufijtë e tyre, por kemi mjetet për t’u përgjigjur. Nuk do të kufizohemi në përdorimin e pajisjeve të blinduara. Të gjithë duhet ta kuptojnë këtë.”
Zëdhënësi i Kremlinit, Dmitry Peskov, nuk pranoi të shtjellonte komentet e Putinit, por u tha gazetarëve se “teksa armë të reja po shpërndahen nga Perëndimi, Rusia do të përdorë më shumë potencialin e saj për t’u përgjigjur”.
Putin ishte në Volgograd për të shënuar përvjetorin e fundit të Betejës së Stalingradit në Luftën e Dytë Botërore. Mbi 1 milion njerëz vdiqën në këtë betejë, më e përgjakshmja e Luftës së Dytë Botërore. Gjatë gjithë luftës në Ukrainë, Putin ka kërkuar në mënyrë të rreme të paraqesë pushtimin e Rusisë si një betejë kundër nacionalistëve dhe nazistëve të cilët ai pretendon se po udhëheqin qeverinë e Kievit. Ai iu kthye kësaj teme edhe gjatë gjithë fjalimit të tij.
“Tani, për fat të keq, ne shohim se ideologjia e nazizmit, tashmë në petkun e saj modern, në manifestimin e saj modern, përsëri krijon kërcënime të drejtpërdrejta për sigurinë e vendit tonë. Përsëri dhe përsëri ne duhet të zmbrapsim agresionin e Perëndimit kolektiv” – tha ai.
Discussion about this post