Mbrëmjen e sotme do të luhen ndeshjet e fundit kualifikuese për Botërorin ‘Qatar 2020’ dhe Kosova do të ketë përballë në stadiumin ‘Fadil Vokrri’ gjigandët e Spanjës.
Në një konferencë për mediat përpara kësaj sfide shumë të vështirë mbrojtësi i verdhebluve, Florent Hadërgjonaj është shprehur besim plotë se ‘Dardanët’ nuk do të dalin pa pikë mbrëmjen e sotme.
“Është një ndeshje shumë e rëndësishme për ne, shumë e madhe. E dimë se çfarë ekipi do të kemi përballë. Luajmë ndaj një prej më të mirëve në botë.
Nëse mendojmë që nuk arrijmë pikë, nuk do të futeshim në lojë. Jemi duke e pritur me gëzim që të tregojmë veten. Kemi arritur të bashkohemi si ekip.
Katër pikët në dy ndeshjet e fundit na japim vetëbesim dhe e dimë se si mund të luajmë. Shpresoj që lojtarët që janë me lëndime, të jenë gati dhe të bëjmë një lojë të mirë”, ka thënë Hadërgjonaj, i cili ka luajtur në të dy krahët e mbrojtjes te Kosova.
“Pozicioni? E kam thënë edhe më parë, unë vij këtu me gjithë dëshirë, nuk ka rëndësi a luaj mbrojtës i djathtë apo i majtë. Nuk ka problem për mua sepse nuk mendoj shumë se ku luaj, por si të jap maksimumin”,-tha 27-vjeçari.
Ky takim do të zhvillohet në orën 20:45, ndërsa rikujtojmë se Kosova renditet në vend të tre të Grupit B me 4 pikë, pas Spanjës së vendit të parë me 10 pikë dhe Suedisë së vendit të dytë që ka 9 pikë./Gijotina.com
