Gjykata ka vendosur masën e sigurisë “arrest me burg” ndaj Eduart Kondit, 34-vjeçarit i cili tre ditë më parë qëlloi në ajër me armë zjarri, në një plazh në zonën e Radhimës. Seanca është zhvilluar ditën e djeshme pa praninë e avokatit.
Përplasja mes vëllezërve ndodhi disa ditë më parë në mes të plazhit “Bora-Bora” në pronësi të Eduard Kondit, aty ku u shkreh edhe arma. Eduard Kondi qëlloi në drejtim të vëllait Benjamin Kondit por fatmirësisht nuk pati të lënduar. Prej dy ditësh, Benjamini ishte kthyer nga Anglia, ndërsa për shkak të konfliktit të mëparshëm Eduardi qëlloi disa herë në ajër dhe u largua me vrap.
Ditën e parë Benjamini kishte shkuar në lokal për të konsumuar diçka, por kjo siç duket ka shqetësuar vëllain e tij Eduardin, i cili kur e ka parë i është drejtuar me fjalët “Çfarë do këtu që ke ardhur”.
Më pas ka hequr syzet dhe ka nxjerrë pistoletën duke qëlluar në ajër disa herë. Policia ka arrestuar disa orë më vonë Eduardin në një shtëpi në Lungomare. Ndërkohë sipas burimeve nga policia e Vlorës shkak janë bërë mosmarrëveshjet e mëparshme të viteve të kaluara që dy vëllezërit kanë pasur me njëri-tjetrin.
Discussion about this post