Policia e Tiranës ka finalizuar me sukses operacionin e koduar “Danger”, duke vënë në pranga një 30-vjeçar me rrezikshmëri të lartë shoqërore, i cili ishte shpallur në kërkim për vrasje të mbetur në tentativë dhe armëmbajtje pa leje. Ngjarja për të cilën akuzohet ka ndodhur më 30 maj 2025, në Fllakë, ku ai qëlloi me armë zjarri drejt një automjeti ku udhëtonin tre persona, për motive të dobëta.
Sipas njoftimit të Policisë, 30-vjeçari, me iniciale K. K., u lokalizua dhe u arrestua në zonën e “Komunës së Parisit” në Tiranë. Gjatë arrestimit, ai i paraqiti Policisë dy dokumente identifikimi të dyshuara si të falsifikuara, me të dhënat e një personi tjetër.
Në pranga ra edhe një 31-vjeçar, F. K., i cili dyshohet se ka ndihmuar autorin e dyshuar të fshihej. Gjatë kontrollit fizik, këtij të fundit iu gjet një sasi municioni luftarak. Policia ka sekuestruar gjithashtu dokumentet e falsifikuara dhe një automjet.
Çështja është transferuar në DVP Durrës për veprime të mëtejshme hetimore.
Discussion about this post