Zbardhet dëshmia e Klevis Ndrecës, një nga personat e përfshirë në sherrin me armë ditën e djeshme në Laç. Ai u vetëdorëzua pas lokalizimit nga policia dhe kontrolleve me dron në zonën ku ishte fshehur.
Në dëshminë e tij para autoriteteve, 28-vjeçari ka deklaruar se qëlloi me armë drejt të rinjve, pasi ishte trembur. “Kam qëlluar me armë drejt të rinjve sepse u tremba. I pashë që kishin armë dhe donin të më godisnin”, tha ai në polici.
Si ndodhi ngjarja?
I arrestuari Klevis Ndreca 28 vjeç ka qenë në makinë me Amarildo Ndojn 26 vjeç, ndërsa Daniel Gjeloshi 26 vjeç ka qenë në makinë me Liridon Ismailaj 26 vjeç dhe Gerald Bitrin 24 vjeç.
Të rinjtë janë konfliktuar verbalisht për shkak se gjatë lëvizjes me makinë kanë kapur pasqyrat e njëri-tjetrit. Konflikti verbal 5 minuta më vonë ka agravuar në përdorimin e pistoletave. Pas konfliktit, të rinjtë kanë lënë një pikë takimi për t’u sqaruar.
Sapo kanë ndaluar dhe zbritur, të gjithë nga makinat kanë dalë në këmbë e janë afruar. Ndreca ka nisur të qëllojë me armë. Ndreca dhe Gjeloshi kanë qëlluar me armë në drejtim të njëri-tjetrit. Klevis Ndreca ka qëlluar me armë drejt tre të rinjve të tjerë të cilët i la të plagosur (sot në spital ndërroi jetë Gerald Bitri), nga të shtënat me armë i plagosur aksidentalisht mbeti edhe shoku i tij Amarildo Ndoj dhe shitësja ambulante.
Me armë zjarri pistoletë është kundërpërgjigjur edhe Daniel Gjeloshi por nuk ka plagosur asnjë person. Arma që u gjet pak metra larg vendit të ngjarjes i përket 26-vjeçarit Daniel Gjeloshi. Klevis Ndreca pas ngjarjes është larguar në këmbë.
Discussion about this post