Dështon pakti Rama-Meloni për emigrantët, 138 milionë euro për një qendër bosh

Qendra e emigrantëve në Gjadër, një nga projektet më të bujshme të marrëveshjes Rama-Meloni, vijon të përballet me probleme dhe kritika.

Sipas gazetës spanjolle “El País”, struktura në Shqipëri mbetet pothuajse bosh, ndërsa zbatimi i projektit është penguar nga beteja të shumta ligjore.

Marrëveshja mes Shqipërisë dhe Italisë parashikonte që emigrantët e kapur në det nga autoritetet italiane të dërgoheshin në Gjadër.

Aty do të kryheshin procedurat për shqyrtimin e kërkesave për azil dhe kthimin e personave që nuk do të përfitonin mbrojtje.

Megjithatë, mekanizmi i parashikuar nga marrëveshja është përballur me pikëpyetje të forta ligjore.

Gjykata e Drejtësisë së Bashkimit Evropian po shqyrton çështje që lidhen me ligjshmërinë e procedurave të azilit dhe ndalimit të emigrantëve jashtë territorit të BE-së.

Një tjetër problem i madh është kostoja financiare e projektit.

Sipas të dhënave të cituara nga “El País”, mirëmbajtja e qendrës arrin rreth 138 milionë euro në vit.

Shifra është veçanërisht e lartë duke pasur parasysh numrin e kufizuar të emigrantëve që janë akomoduar në qendër.

Struktura ishte projektuar për të menaxhuar deri në mijëra persona, por në praktikë përdorimi i saj ka qenë shumë më i ulët.

Kjo ka shkaktuar kritika të forta nga opozita italiane, e cila e konsideron projektin një investim me kosto të lartë dhe rezultate të pakta.

Qeveria e Giorgia Melonit, nga ana tjetër, vijon ta mbrojë marrëveshjen, duke e paraqitur atë si një model të ri për menaxhimin e emigracionit.

Por kostot e larta, numri i ulët i emigrantëve dhe pengesat ligjore kanë shtuar pikëpyetjet mbi të ardhmen e paktit Rama-Meloni.