Fshati Imsht në Lushnjë është i lënë në harresë nga institucionet përkatëse, qendra shëndetësore prej 30 vitesh nuk ka njohur asnjë investim.
Në fshat mungon dhe infrastruktura, ndërsa banorët shprehen të shqetësuar për një situatë ku asnjë nga institucionet përgjegjëse nuk jep zgjidhje.
Qendra shëndetësore e cila ndodhet në këtë fshat nuk ka mjekë, por vetëm dy infermiere, ndërsa në katin e dytë të ndërtesës banon një familje.
“Ka vetëm një infermier, mjeku nuk vjen këtu. Funksionon si qendër shëndetësore por nuk është e mjaftueshme për këtë fshat me kaq shumë banorë, mjekët nuk vijnë pavarësisht kërkesave tona. Vizita nuk bëhen këtu”– u shpreh ish-kryeplaku i zonës.
“Rruga për tek kjo qendër shëndetësore është e pakalueshme për makinat në rast urgjence, tualeti me kushte skandaloze pasi nuk ka as gropë septike dhe në dimër rruga mbushet me ujë”- shprehet një qytetar.
Ish-Kryeplaku i fshatit Imsht tregon se qendra shëndetësore ka kushte minimale dhe nuk është e përshtatshme për një fshat me rreth 350 banorë.
