Padrejtësitë më të mëdha bëhen në emër të shtresave në nevojë. Tenderi që paraqesim më poshtë është shembulli se si abuzohet me buxhetin e caktuar për Qendrën e Zhvillimit të Personave me Aftësi të Kufizuar në Vlorë. Ky institucion ka zhvilluar një tender pa konkurrencë për të blerë vezë, fruta e perime për personat me aftësi të kufizuara. Ky prokurim është totalisht në kundërshtim me ligjin e prokurimit, e për këtë arsye “Open Data” e ka klasifikuar me “flamur të kuq”, për mungesë konkurrence. Në procedurën e hapur në datën 7 shkurt 2022, ku është shpallur edhe fituesi, Qendra Sociale parashikon blerje mallrash ushqimore për personat me aftësi të kufizuar.
Tenderi mban numrin e referencës REF-18779-02-04-2022 dhe ka fondin limit prej 1 217 913, 00 lekëve të reja, ose 12 milionë lekë të vjetra. Kompania fituese “ENKLEJ”, parashikon se me shumën e ofruar do të furnizojë me ushqim personat me aftësi të kufizuara në Qendrën Sociale në Vlorë.
Kontrata marrëveshje kuadër me afat 12 muaj është e ndarë në 5 lote: Loti 1: “Blerje bukë”; Loti 2: “Blerje qumësht dhe nënprodukte të tij”; Loti 3: “Blerje vezë, fruta, perime”; Loti 4: “Blerje mish dhe nënprodukte të tij”; Loti 5: “Blerje ushqime koloniale”. Gjithsej janë planifikuar 4,583,333 lekë pa tvsh.
Loti 3, për të cilin bën fjalë Open Data, parashikon “Blerje vezë, fruta, perime” me fond limit 1,217,913 (një milion e dyqind e shtatëmbëdhjetë mijë e nëntëqind e trembëdhjetë) lekë pa tvsh.
Titullarja e kësaj qendre Elida Grabova ka autorizuar tenderin me shkelje. Ne nuk e dimë se si do të vijojë më tej furnizimi i kësaj qendre, por e sigurt është se me kaq para mund të bliheshin më shumë ushqime.A.L/ gijotina.com
Discussion about this post