Qëndresa Qytetare, një OJQ monitoruese dhe avokature, ka denoncuar problematikat gjatë procesit zgjedhor. Qëndresa Qytetare ka vënë në pah një sërë problematikash deri në orën 13:00 në 14 bashki. Bëhet fjalë për pezullimin e procesit në 532 qendrat e votimit, ku pajisjet e identifikimit elektronik nuk punuan. Kjo ndikoi në dekurajimin e qytetarëve për të ushtruar të drejtën e votës. Po ashtu është ushtruar presion dhe intimidim nga drejtues të administratës dhe kandidatë për zgjedhjet lokale ndaj qytetarëve në bashkitë Elbasan, Tiranë, Kukës dhe Durrës, brenda dhe në oborret e qendrave të votimit. Ka patur raste të votimit familjar dhe tentative për të fotografuar votën.
Problematikat
Gjatë monitorimit të procesit të votimit deri në orën 13:00 nga vëzhguesit e Qëndresës Qytetare janë vëne re problematikat e mëposhtme:
– Pezullimi i procesit në 532 qendrat e votimit, ku pajisjet e identifikimit elektronik nuk punuan, ndikoi në dekurajimin e qytetarëve për të ushtruar të drejtën e votës.
– Presion dhe intimidim nga drejtues të administratës dhe kandidatë për zgjedhjet lokale ndaj qytetarëve në bashkitë Elbasan, Tiranë, Kukës dhe Durrës, brenda dhe në oborret e qendrave të votimit.
– Janë evidentuar raste të votimit familjar në bashkitë Shkodër, QV. 266, 2122/00, 313/1 dhe në Bashkinë Tiranë QV 1996/1. Problematika gjithashtu në këto qendra janë vënë re edhe në pozicionimin e dhomës së votimit, e cila ekspozon votuesin kah vëzhguesve dhe komisionerëve në lëvizjet e dorës gjatë procesit të votimit.
– Vëzhguesit e partive shënojnë ID-të e votuesve, pas përsëritjes me zë të lartë të kodit të votimit nga e komisioneri pas verifikimit në pajisjen PEI, duke intimiduar zgjedhësit.
– Në Bashkinë Kukës Drejtori i Burgut të Kukësit ka shoqëruar në qendrën e votimit të burgosurit duke qëndruar pranë tyre gjatë procesit të votimit në QV – 0647.
– Vihet re prezenca e numrit të lartë të personave të paautorizuar ose me bage, jo nga KQZ të cilët shoqërojnë, orientojnë dhe komunikojnë me votues. Ky fenomen është evidentuar në QV 266, 276/ Shkolla Prenk Jakova, QV 2464, 2454/1, 2361/00 Elbasan, Shkolla Edith Durham, Shkolla Dëshmorët e Prishtinës, tek QV 309/1 dhe 310.
– Janë evidentuar raste të përdorimit të aparateve celularë brenda qendrave të votimit dhe tentativave për të fotografuar votën, konkretisht në QV 732, 734, 741, 734/1, 741/1 në Lezhë.
– Në QV 1357 në zonën e Yzberishtit në Tiranë janë penguar vëzhguesit dhe përfaqësuesit e medias për të vëzhguar procesin e votimit me justifikimin e hapësirave të ngushta.
Discussion about this post