Një protestë pritet të mbahet ditën e premte, në orën 19:00, para godinës së Kryeministrisë në Tiranë.
Me foton duar shtrënguar, Kosovë-Shqipëri dhe flamujt e dy shteteve, citohet në poster: Dje, sot, nesër, përjetë bashkë.
Ky pritet që të jetë edhe slogani i protestës, që po organizohet në rrjetet sociale dhe duket se ka lidhje me qëndrimet e shfaqura publikisht nga Kryeministri Edi Rama, që janë kritikuar nga një pjesë e politikës në Tiranë, por edhe nga Prishtina.
Protesta vjen në një kohë kur tensionet në veriun e Kosovës arritën kulmin ditën e djeshme, kur nga forcat special serbe, u rrëmbyen brenda territorit të Republikës së Kosovës, 3 zyrtarë të policisë kufitare.
Një ditë para kësaj ngjarjeje, Kryeministri Edi Rama në një deklaratë të jashtëzakonshme për mediat deklaroi anulimin e mbledhjes së përbashkët mes dy qeverive, e cila do të mbahej në Gjakovë, ndërsa bëri përgjegjës Albin Kurtin për mënyrën se si po menaxhon situatën në Veriun e Kosovës. Madje Rama paralajmëroi se Kurti dhe Kosova mund të përballeshin me sanksione nga ajo që e quajti si bashkësia euro-atlantike, duke theksuar se Shqipëria, si vend anëtar i NATO dhe vend kandidat për në BE, nuk mund të vepronte si “UFO”, pavarësisht vëllazërisë që ka mes dy vendeve.
Discussion about this post