Deputeti demokrat Agron Gjekmarkaj, njëherazi edhe nënkryetari i Kuvendit, ka reaguar përmes një deklarate lidhur me kaosin në Parlament, por edhe ndaj thirrjes së dy Ambasadave të akredituara në Tiranë, asaj amerikane dhe britanike.
Gjekmarkaj në reagimin e tij thekson se një parlament që nuk respekton të drejtat e opozitës, humb funksionimin normal të tij.
Ai i bën thirrje kryeparlamentares Nikolla dhe mazhorancës që të reflektojnë.
“Përshëndes deklaratat konstruktive të partnerëve tanë strategjik SHBA-Britani e Madhe, për dialog konstruktiv mes opozitës dhe mazhorancës. Me përgjegjësinë ndaj interesit të qytetarëve prej më shumë se një muaj, opozita kërkon kthimin në normalitet të Parlamentit dhe funksionimin e plotë të tij, duke respektuar të drejtat kushtetuese të opozitës.
Një parlament që nuk respekton të drejtat e opozitës, humb funksionimin normal të tij, duke mohuar ushtrimin e përgjegjësisë për mbikëqyrjen demokratike të qeverisë. Është e papranueshme për një vend demokratik që dialogu konstruktiv mes palëve të zëvendësohet me shndërrimin e sallës së parlamentit në repart gardist, për të shuar me forca sigurie zërin e opozitës për të drejtat e saj.
Me besimin e plotë se funksionimi normal i Parlamentit kërkon mbi të gjitha respektimin e opozitës, i bëj thirrje Kryetares së Kuvendit dhe mazhorancës të reflektojnë dhe ti krijojnë opozitës mundësinë për të ushtruar e qetë të drejtat e saj kushtetuese në mbrojtje të interesit të qytetarëve. Ngritja e Komisioneve Hetimore dhe heqja dorë nga emërimi i opozitës, janë parakushte për një Shqipëri të denjë për të qenë anëtare e NATO-s dhe vend kandidat në BE”, thuhet në reagimin e Gjekmarkajt.
Discussion about this post