“Qëndroni kryeministër sa të keni frymë”/ Rama ‘habitet’ me patronazhistin në New York

Kryeministri Edi Rama nuk i kurseu batutat gjatë takimit me shqiptarët në New York.

Qytetari: Ju flet një anëtar i vjetër i Partisë Socialiste, që prej vitit 1991, ju kam ndjekur në rrugën tuaj në udhëheqje të këtij vendi. Ju falenderoj pa masë…

Rama: Ju lutemi bëni pyetjen, sepse ka dhe të tjerë që duan të pyesin.

Qytetari: Kemi dëgjuar shumë herë komente nga udhëheqës të ndryshëm të opozitës që thonë se Edi Ramën nuk e mundim tonë. Jemi krenarë që ata e dinë këtë punë (ngre zërin)

Rama: Çfarë ke mo? Ti je dhe në Amerikë

Qytetari: Nuk është kusht i domosdoshëm që një udhëheqës i lavdishëm si ju të qëndroni dy palë zgjedhje…

Rama: Të lutem më bëj pyetjen

Qytetari: Na gëzo të gjithë ne, që nuk do të jepni dorëheqjen pas një palë zgjedhjesh…

Rama: Ky është urdhër

Qytetari: Është dëshirë, të qëndroni në krye të PS sa të keni frymë dhe të qëndroni kryeministër sa të keni frymë.

Nga New York-u, kryeministri Edi Rama kërkoi angazhimin e diasporës në zgjedhjet e ardhshme parlamentare, për të mos rrezikuar, sikurse tha ai progresin që Shqipëria ka bërë deri tani.

“Diaspora sot duhet të luajnë për Shqipërinë atë rol që kanë luajtur shqiptarët këtu që kanë ndihmuar shqiptarët që kanë ardhur. Ju me pjesëmarrjen në zgjedhje, duhet të bëheni garantët që Shqipëria nuk kthehet më mbrapa. Shqipëria ka bërë progres të jashtëzakonshëm, por është akoma një progres në rrezik nëse të gjithë bashkë nuk e shtyjmë përpara në këtë kilometër të fundit për t’u bërë anëtare e BE-së”, tha Rama.

Sipas tij “nëse ne kapërcejmë përçarjen dhe e shohim politikën dhe partitë aty ku është interesi dhe jo si skuadra futbolli, do bëjmë shumë më tepër. Shkodra është shembulli më kuptimplotë se si paragjykimet dhe përçarja e morën peng kryeqendrën e veriut dhe e lanë pas qyteteve të tjera, duke e lënë në duar të paafta të cilët paaftësinë e tyre e kanë mbuluar me flamurin e anti komunizmit”.

gijotina.com/