Një shqiptar është arrestuar në kufirin që lidh Italinë me Slloveninë me rreth 320 mijë euro cash të fshehura në automjetin e tij. Sipas Guardia di Finanza e Triestes, pas një kontrolli rutinë rrugor në kufirin tokësorë dalës drejt Sllovenisë, është ndaluar një automjet i drejtuar nga një shtetas shqiptar.
Gjatë kontrollit ai ka pohuar se nuk ka asgjë për të deklaruar tek autoritetet doganore. Kontrolli i automjetit nga financierët italianë, e me ndihmën e qenve nuhatës, ka çuar në gjetjen e 321.450 Euro të fshehura në një vend të modifikuar enkas në makinë. Sasia e parave u gjet e ndarë në 38 pako të konfeksionuara me qese të zezë e fshehur nën pedalet e automjetit në një vend të modifikuar në mënyrë artificiale.
Paratë dhe automjeti janë vënë nën sekuestro paraprake, ndërsa shtetasi shqiptar është dërguar për ndjekje penale tek autoritetet e drejtësisë italiane me akuzën e riciklimit e trafikimit të paligjshëm të parave te padeklaruara e rrezikon një përgjegjësi penale.
Discussion about this post