Qeveria shpërthen ndaj Ahmetajt pas audiopërgjimit për trafikun e armëve: Të ketë guximin të vijë këtu

Qeveria e Edi Ramës ka reaguar për herë të parë pas akuzave të rënda që ish zv.kryeministri Arben Ahmetaj se qeveria është përfshirë në trafikun ndërkombëtar të armëve.

Ka qenë ministrja për Shtetin dhe Parlamentin, Erjona Ismaili, ajo që ka reaguar pas mbledhjes së qeverisë lidhur me akuzat e pretenduara dhe të ngritura nga ish-zv.kryeministri Arben Ahmetaj, i cili ndodhet në arrati.

Sipas Ismailit, akuzat e Ahmetajt nuk qëndrojnë. Ajo ka deklaruar për mediat se ish-zyrtari i lartë duhet të ketë guximin të përballet me drejtësinë.

“Zotëria, siç hedh llum ndaj punëve të qeverisë, të gjejë guximin dhe të vijë të përballet me drejtësinë”, u shpreh Ismaili.

Disa ditë më parë, Arben Ahmetaj ka ngritur akuza ndaj qeverisë dhe disa zyrtarëve, të cilët, sipas tij, janë të përfshirë në trafik armësh.

Ahmetaj publikoi disa audiopërgjime të shkurtra, në qendër të të cilave, ai pretendon se është biznesmeni izraelito-amerikani Ron Yeffet, mik i ngushtë i kryeministrit Edi Rama, sipas tij, dhe dy qytetarë ukrainfolës dhe rusisht folës, të cilët identifikohen vetëm me emrat Igor dhe Sergei. Sipas Ahmetajt, bëhet fjalë për një plan për trafik të armëve dhe municioneve duke përdorur Shqipërinë, përmes sipërmarrjeve ku Yeffet është partner me ndërmarrjen ushtarake shqiptare Kayo.

Ahmetaj deklaroi se hetimi nga SPAK për këto pretendime duhet të jetë i thelluar dhe serioz, ndërsa shprehu shqetësimin e tij se mund të ketë ndërhyrje nga kryeministri Edi Rama.

Ish-zëvendës kryeministri ngriti një sërë pyetjesh lidhur me prodhimin dhe destinacionin e armëve. Ai kërkoi të sqarohet se në cilat fabrika prodhohen, çfarë lloj armësh prodhohen, cilat janë patentat dhe ku dërgohen më pas. Sipas Ahmetajt, në audiopërgjime flitet për trafik armësh nga vende të embarguara.

“Kush ne? Qeveria e Republikës apo instrumentet kriminale si Timac Defence apo Advanced Arms Technology. Kush e bën prodhimin e armëve, në çfarë fabrike, çfarë lloj armësh dhe patentash janë? A ka armë që kanë ardhur nga vende të embarguara. Ku janë dërguar, kush i ka dërguar? A kanë stemën e Republikës së Shqipërisë apo janë deal-e përtej syve të NATO-s.”, shtoi ai.

Ndërsa opozita ka kërkuar hetim parlamentar për pretendimet e bëra publike, qeveria ka zgjedhur të mos komentojë përmbajtjen e regjistrimit dhe ta zhvendosë debatin te statusi i Ahmetajt përballë drejtësisë shqiptare.