Këshilli i ministrave ka akorduar një fond prej 1 200 000 (një milion e dyqind mijë) lekë për prokuroren e Pukës Elidiana Kasa, e cila mjekohet për shkak të problemeve me shëndetin mendor.
Në vendimin e qeverisë thuhet se ky fond do të përballohet nga Fondi i Sigurimit të Detyrueshëm të Kujdesit Shëndetësor. Pagesa do të bëhet me paraqitjen e faturave përkatëse të institucionit të kurimit.
Kryeministri Rama dhe 16 ministrat e qeverisë re u betuan mëngjesin e sotëm para presidentit Ilir Meta për katër vitet e ardhshme në pushtet.
Mbledhja e parë e qeverisë, sipas protokollit u nis nga kryeministri Rama, i cili i njohu ministrat me Kodin Etik që duhet të respektojnë, përfshirë ndalimin e udhëtimeve të luksit, dhuratat, apo përdorimi i makinës së punës.
Në fund të mbledhjes ai bëri të ditur dhe vendimet e para të qeverisë “Rama 3”, ku ndër pikat më të rëndësishme ishte “Fëmijë në përkujdesje të Republikës”, i cili përcakton dhënien deri në 18 vjeç të rrogës së prindit të rënë në krye të detyrës apo në një akt vetëmohimi në mbrojtje të jetës së të tjerëve.
Ndër të tjera, në vendime përfshihej edhe projekt-Ligj për “Bashkëqeverisjen”, i cili përcakton mekanizma detyrues për shërbimet publike ndaj qytetarëve e sipërmarrjeve, si edhe sanksione për zyrtarët që rezultojnë pengues të zgjidhjeve për qytetarët.
Gjithashtu, përfshirja në strukturat e Forcave Armatosura të Republikës së Shqipërisë, e dy kampioneve olimpike të Kosovës, Nora Gjakova dhe Distria Krasniqi. Në fund u vendos të krijohet dhe Agjencia për Mediat dhe Informimin e Këshillit të Ministrave të Republikës së Shqipërisë.
