Bizneset që nuk regjistrohen në afatet e përcaktuara ose deklarojnë të dhëna të pasakta do të kenë gjoba të katërfishuara. Në draft qeveria parashikon që gjoba nga 15 mijë lekë të bëhet 60 mijë lekë. Ndryshimet në projektligjin “Për Regjistrimin e Biznesit” janë dorëzuar në Kuvend dhe pritet të kalojnë për diskutim dhe miratim në komisione dhe parlament, me nisjen e sesionit të ri për vitin 2022.
Sipas qeverisë, ligji aktual në fuqi që parashikon aplikimin e gjobave, në rast të mospërmbushjes brenda afateve ligjore të detyrimit ligjor për kryerjen e regjistrimeve përkatëse në regjistrin tregtar dhe mosdeklarimeve reale, është konsideruar të ulëta.
Në relacionin e projektligjit argumentohet se niveli i gjobave në disa vende të rajonit është disa herë më i lartë se në vendin tonë dhe kjo e bën të detyrueshëm ndryshimin e ligjit aktual. Referuar të dhënave gjoba e aplikuar në shtetin e Malit të Zi është 1000 Euro, Greqia 600 euro dhe Sllovenia 400 euro.
Qeveria e cilëson të nevojshme ndërhyrjen në projektligj për forcimin e detyrimit për regjistrimin fillestar dhe regjistrimeve te tjera në afatin e caktuar. Objektivat e këtij projektligji janë forcimi i detyrimit për deklarimin e të dhënave te vërteta në Regjistër nga ana e subjekteve tregtare.
Rritjen e konkurrueshmërisë dhe përmirësimin e klimës së biznesit nëpërmjet deklarimeve reale dhe regjistrimit ne kohë të bizneseve. Si dhe të rritet më tej transparenca lidhur me deklarimet që bëjnë bizneset lidhur me të dhënat e tyre.
Discussion about this post