Koncesionet e shumta në vendin tonë përbëjnë një rrezik të lartë për ekonominë dhe këtë e kanë vërtetuar KLSH, auditi i brendshëm i MFE, FMN dhe Banka Botërore, por qeveria jonë kërkon të mbulojë “diellin me shoshë”. Gjatë një interviste televizive, Ministrja e Financave, Delina Ibrahimaj, tha se PPP nuk përbejnë risk për buxhetin e shtetit, kur në fakt vetëm disa ditë më parë vetë kjo ministri ka pranuar rrezikun e lartë të tyre përmes buxhetit faktik 2020 të depozituar në Kuvend.
Në atë dokument thuhet saktësisht se, koncesionet përbëjnë një risk të lartë në buxhetin publik edhe për vitin 2021. “Vlerësohen me rrezik të lartë edhe projektet me PPP. pagesat vjetore për PPP-të, mund të tejkalojnë nivelin e lejuar ligjor prej 5% të të ardhurave tatimore faktike të vitit 2021”, përcakton raporti.
Ndërsa sot ministrja gënjen duke thënë të kundërtën. “Kontratat koncesionare patjetër që kanë një kosto. Ato janë të parashikuara në buxhet. Tashmë Ministria e Financave ka filluar të publikojë një raport që lidhet me koncesionet që lidhet me monitorimin e ecurisë së tyre. Të gjitha koncesionet janë të monitoruara, ka raporte publike. Brenda kësaj jave pritet të publikohet raporti i radhës. Nuk përbëjnë risk për buxhetin e shtetit”, u shpreh ajo.
Ndërkohë, ministrja foli edhe për faturat e arbitrazhit ndërkombëtar, për të cilat tha se në shumicën e rasteve nuk janë ende një detyrim për buxhetin e shtetit. Por kjo nuk do të thotë që shpëtuam një ditë ato detyrime do të paguhen dhe do merren nga taksapaguesit shqiptar.
